Davao City – Kasong robbery ang atubangon sa usa ka lalaki nga nanglungkab sa usa ka establisemento sa Purok 9, Poblacion, Nabunturan, Davao de Oro alas 10:30 sa gabii niadtong Abril 24, 2023.
Sa interbyu sa DXDC RMN Davao kang Non-Uniformed Personnel (NUP) Antojen Filipino, personahe sa Nabunturan Municipal Police Station (MPS), giila niini ang suspek nga si Jelmark Alsa, anaa sa kapin 20 anyos ang edad, residente sa Nabunturan.
Usa ka tindahan sa motorparts ug accessories ang maoy gipuntirya sa suspek nga dali usab nga nasikop sa awtoridad.
Matud sa suspek, aduna siyay grupo nga nagahimo usab sa maong iligal nga binuhatan sa maong lungsod.
“Isa lang siya (ang suspek). Ang ingon niya naa daw siyay mga kauban pero kadto nga time, wala,” sulti sa pulis.
Padayon karong gialerto sa kapulisan ang katawhan nga mag-igmat kanunay ug i-report ang mga kadudahang tawo o panghitabo sa palibot aron kini gilayong maaksyonan.
RadyoMaN Kirby Manzon
Facebook Comments
