Davao City – Bangi sa yuta ang motibo sa pagpanigbas sa usa Arnel Nasiad, 32-anyos nga miresulta sa pagkamatay sa kainom niining si Pascual Cañedo Jr. ug pagka angol usab sa usa ka Jaime Dianap human sa insidenteng nahitabo sa Purok 3, Brgy. Labon, Sulop, Davao del Sur niadtong Domingo (Marso 7, 2021).
Sa interbyu sa DXDC RMN Davao kang Police Major Marilou Apa, Office-In-Charge (OIC) sa Sulop Municipal Police Station (MPS), gibutyag niini nga ni-surrender ang suspek alas-8:45 kagahapon sa buntag (Marso 8, 2021) tungod sa pagmahay niini sa panghitabo.
Gisaysay sa pulis nga dugay na nga nagbaton og bangi ang suspek ug ang biktima ug didto na niini nabuhat ang krimen atol sa ilang pag inom diin swerte pa nga nakaikyas ang usa sa ilang kainom, gawas sa namatay ug naangol.
“Mura’g naa na gyud ni siyay motive gyud nga patyon kay nag lagot-lagot ni kay naa man gyud silay grudges sauna pa tungod lagi sa yuta. So nilakaw daw ning suspek accordingly tapos nikalit la’g kuha og sundang tapos gipangtigbas sila,” saysay sa pulis.
Kasong murder ug frustrated murder ang atubangon sa suspek diin kini napasang-at na sa korte kagahapong adlawa.
Gipakusgan usab sa Sulop MPS ang ilang pagpatrolya sa mga barangay sa pag-monitor sa inom labi na nga hugot usab nga gidili ang panagtapok kun mass gathering tungod sa pandemya hatud sa Coronavirus Disease 2019 (COVID-19) pandemic.
RadyoMaN Kirby Manzon
