Davao City – Kasong murder ang gipasang-at sa SITG Punong Barangay Daanton batok sa mga suspek sa pagpusil-patay sa presidente sa Monkayo Association of Barangay Captains (ABC).
Gibutyag ni Compostela Valley Provincial Director Senior Superintendent Roderico Roy atol sa interbyu sa RMN Davao nga gawasnon pa gihapon ang mga suspek nga nibugha kang Barangay Banlag Kapitan Danilo Daanton nga sila Renejay Castillo ug duha pa ka mga John Does.
“Mubuhat karon og resolution ang prosecutor nga kung naa bay probable cause o wala kung walay probable cause nga nakita, among ipadayon ang pagpalig-on sa kaso ug kung naay probable cause i-file ang kaso didto sa korte ug mupagawas na og warrant of arrest,” matud ni Roy.
Segun ni Roy adunay mga pipila ka mga saksi ang nitudlo kang Castillo nga maoy responsable sa pagkutlo sa kinabuhi sa punong barangay human kini nag-basketball niadtong Abril 21 alas 5:55 sa may Purok 9, Golden Plains Subdivision, Barangay Poblacion, Monkayo.
Gituohan usab nga ang maong suspek paryente ra sa usa sa duha ka mga nadakpang membro sa gun for hire o Castillo Criminal Gang kinsa mga naduhig sa mga nahitabong pagpamatay sa Comval.
Naaresto niadtong bulan sa Mayo sila Alex Dianson alyas Benjack ug Jayson Paraiso Castillo atol sa gihimong operasyon sa Criminal Investigation Detection Group (CIDG) ComVal pinaagi sa search warrant nga gipagula sa korte.
Nasakmit gikan sa maong mga suspek ang .45 nga airgun, mga bala, ug uban pang mga paraphernalia.
RadyoMaN Aimee Guinita
