Nagsungka sa banwa sang EB Magalona sa otoridad ang suspek nga nagbuno sa isa ka babayi sa natabo nga away pamilya sa Brgy. Mansilingan sang nagligad nga inadlaw.
Ang suspek nakilala kay Rey Barredo, 26 anyos, residente sang Purok Punay, Brgy. Mansilingan, syudad sang Bacolod kag barkada sang mga kabataan sang pamilya Duerme.
Madumduman nga sang nagligad nga Hulyo 28 nagluntad ang kinagamo sa tunga sang pamilya Duerme kag pamilya Bonghanoy bangud gid lamang sang kanal nga gina-agihan sang tubig.
Sa amo nga insidente, patay ang biktima nga si Riza Bonghanoy, 38 anyos kag si Denmark Duerme, 27 anyos, samtang pilason naman sanday Samuel Bonghanoy, 40 anyos, Dennis Duerme, 50 anyos, Justine Duerme, 24 anyos kag Jino Duerme, 21 anyos.
Suno sa suspek, naga inom-inom sila sang natabo ang insidente kon diin sang iya nakita nga ginabuno si Denmark, ini siya ang nagkuha man sang kutsilyo kag ginsulong ang balay sang mga Bonghanoy kag didto nabun-an si Riza.
Detained sa karon ang suspek sa Police Station 7 para sa nagakaigo nga disposisyon.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
