Davao City – Nadakpan na ang suspek sa gituohang gilugos-patay nga 16 anyos nga dalagita nga nakaplagan sa may Prk. 10 Libby Road, Bago Gallera, Talomo District Davao City kagabii, Hunyo 23, 2018.
Kini ang gikumpirma sa hepe sa Talomo PNP nga si PCI Ronald Lao atol sa interview sa DXDC RMN Davao diin nakita sa otoridad ang towel nga gipanag-iyahan sa suspek sa crime scene ug aduna usab mga witnesses nga ang lalaki maoy mibuhat matud pa sa krimen.
Giila ang suspek nga si James Narte, 35 anyos ug residente ra usab sa nasangpit nga lugar diin matud pa siya lang usa ang mibuhat sa mangilngig nga krimen.
Sumala ni Lao, nga ayha pa nahitabo ang krimen kagabii, laing insidente usab ang nahitabo niadtong adlaw Domingo diin parehong suspek ang giila nga gibira matud pa niini ang usa ka babae sa dalan apan misukol ang babaye ug nakaikyas.
Sa karon balhug na ang suspek sa Talomo PNP ug ginahulat ang resulta sa otopsiya diin sumala pa sa kaulisan nga og mapamatud-an nga gilugos ang biktima, pasakahan ang suspek og kasong rape with homicide.
RadyoMaN Renz Barbarona
