Gipangita na karon sa kapulisan ang mga posibleng kauban sa usa ka suspek kinsa mipatay sa usa ka magtutudlo nga taga-Kolambogan, Lanao del Norte.
Matud pa ni Major Salman Saad, public information officer sa Provincial Police Office, gi-angkon sa suspek nga si Mark Miano, 33 anyos, residente sa Barangay Austin Heights, sakop sa lungsod sa Kolambogan.
Pagpangawat, matud pa, ang motibo sa kremin tungod kay nawala ang motorsiklo sa biktimang si Arthur Torres, Jr., 37 anyos, lumulupyo sa Barangay Baybay sa mao gihapon nga lungsod ug magtutudlo sa usa ka tunghaan nga sakop sa Oroquieta City Division sa Misamis Occidental.
Anak si Torres og usa ka konsehal sa lungsod sa Kolambogan.
Nadiskubrehan ang patay’ng lawas ni Torres, nga anaa na sa state of decomposition, sa kalubihan nga bahin, mga lima ka kilometro ang gilay-on sa iyang pinuy-anan.
Nakatimaho, matud pa, og dili masabtang baho ang mga nanglabay sa dapit, hinungdan nga gisusi kini ug nakit-an ang usa ka patay’ng lawas.
Kauban ang pamilya Torres, naila ang biktima tungod sa iyang gisuot ug uban pang mga gamit nga naa sa iyang lawas sama sa kwentas.
Nasuta nga si Miano ang usa sa mga suspek tungod sa impormasyon sa pipila ka saksi.
Matud pa ni Major Rey Odchique, hepe sa Kolambogan police, nasikop si Miano nga nagtago sa iyang mga kabanay sa lungsod sa Tangkal, mga kapin 20 ka kilometro ang gilay-on gikan sa Kolambogan.
Miangkon kini sa kremin nga iyang nahimo lakip na kung kinsa ang iyang mga kauban. (November 6)
