Patay ang suspek sa pagpayuhot sa ginadiling droga, samtang samara ang usa ka pulis sa gipahigayong operasyon sa kapulisan sa Misamis Oriental Provincial Drug Enforcement Unit (PDEU) ug sa Manticao Municipal Police Station, kadlawon kagahapon, Miyerkoles, Hulyo 10, sa Purok Paradise 2, Barangay Cabalantian, manticao, Misamis Oriental.
Giila sa kapulisan ang target sa operasyon nga si Ariel Macas, Jr., taga-Cagayan de Oro City, kinsa maoy unang namusil sa mga operatiba dihang naabot sa iyang gi-rentahang balay nga naa lang luyo sa Cabalantian National High School.
Samtang ang samarang pulis nailing si Patrolman George Sordilla, nga naigo sa iyang walang kamot.
Matud pa ni Police Captain James Bastatas, hepe sa PDEU-Misamis Oriental, naa sa drug watchlist si Macas ug nabilanggo na kini niadtong nakalabay’ng tuig tungod sa kasong droga.
Apan nakagawas kini tungod sa plea bargaining.
Atol sa pag-search sa lawak sa iyang gi-rentahang balay, na-ukayan sa operatiba ang pito ka mga sachet nga dunay sulod sa gitouhang shabu, mga drug paraphernalia ug mga buhing bala.
Una nang na-ukay sulod sa kwarto atol sa pag-proseso sa mga sakop sa Scene of the Crime Operatives (SOCO) ang ubang mga drug paraphernalia, mga bala, cash nga mokabat sa kapin 45 mil pesos, cellphone nga posibleng anaa ang iyang mga transaksiyon ug ang kalibre .38 sa suspek.
Luwas na ang pulis nga samaran ug nagpa-alim nalang sa iyang samad nga naangkon.
-30-
