Suspek sa rape: ‘Handa man ako nga pakaslan siya’—Biktima: ‘Indi ako kay wala ako naluyag sa iya’

ILOILO City – Indi magpasettle si Alias Inday, ang 19 anyos nga ginrape sa Jaro sang nagligad nga semana.

Ini ang panindugan ni Inday sa pihak sang pahayag ni alias Nonoy nga handa ini nga pakaslan ang dalaga bangod pareho man nila nga gingusto ang natabo.

Sa interview sang RMN Iloilo kay alias Inday, ginpahayag sini nga sa Huwebes natabo ang una nga paghimulos sa iya ni Nonoy.


Alas 10 sang gab-i, patay ang suga sang nagahigda si Inday sa sulod sang kwarto sa 2nd floor sang ila gina-estaran sang nagsulod si Nonoy.

Nakasulod si Nonoy bangod wala na lock ang kwarto.

Base sa panaysayon ni Inday, nagsulod si Nonoy kag ginpilit siya nga himuslan.

“Ginapilit ya ako nga hambal ya sige na bala kaisa lang. Hambal ko sang ano? Hambal na sige na bala. Hambal ko indi ako gani. Hambal na nga-a haw? Hambal ko te may migo ko ya. Hambal na sige na bala. Hambal ko indi ko gani,” ang pahayag ni Inday sa interview sang RMN Iloilo.

Suno kay Inday ginkaptan siya sa likod ni Nonoy kag ginpilit nga himuslan siya.

“Sige na bala isa lang. Hambal ko indi ko gani tapos gin ubahan ya ako,” pahayag pa ni Inday.

“Ginapilit ya ako, tapos ginawakli ko siya. Tapos amo na to dayun, gin-ubahan ya ako.”

“Hambal ya sa akon, sige na, ginhambalan ya lang ko nga sige na, aton aton lang ni nga duha, indi ka lang manugid.”

Anchorman: Te nagpabaya ka na lang?

“Huo, ginpabay-an ko na lang siya. After sadto sa dalum na siya nagtulog.”

Suno kay Inday, sang amo nga tion, natabu ang pagrape sa iya, duha lang sila ang tawo sa ibabaw bangod ara sa kwarto sa idalum ang iya upod.

BIERNES, AGOSTO 03, 2018

Sang hapon pagkatapos nga nakalakat ang ila boss sa trabaho, naghigda si Inday sa kwarto.

Nagsulod naman si Nonoy sa iya kwarto kag nag-ayu kon pwede pa siya makascore sang isa pa.

“Nagsulod naman siya nagpalapit naman siya kag naghambal nga sige na bala isa na lang. Indi na ko magliwat dayun,” ang dugang nga panaysayon ni Inday.

Didto kag ginpwersa ni Nonoy si Inday, ginbutong ang shorts, gin-uba kag ginhimuslan. Natabo ang ikaduha nga paghimulos sa iya.

SABADO, AGOSTO 04, 2018

Nagpanugid na si Inday sa iya pakaisa angot sa ginhimo sa iya ni Nonoy, ang iya upod sa trabaho. Nagpangayo na sila sang tabang sa PNP kag napreso si Nonoy.

Naka-estorya man ni Inday ang nanay ni Nonoy kag ginhambalan siya nga kon mahimo indi na lang magpasaka sang kaso kag aregluhon na lang nila ang natabo.

“Hambal sang Nanay ya mapa areglo na lang kuno kag kon ano ipakasal na lang kuno. Hambal ko indi ako kay wala ako naluyag sa ila bata,” pahayag ni Inday.

MENSAHE NI INDAY

Desidido si Inday nga magpasaka sang kaso nga rape kay Nonoy.

“Ipapreso ko gid kay dungog ko gid ang nadula. Te kinahanglan ko siya ipapreso kay nahuy-an na ko nga daan.”

Pahayag ni Inday indi matuod nga gusto man niya ang natabo pareho sang pahayag ni Nonoy.

“Tani akuon ya na lang ang ginhimo ya sa akon para wala na kami sang dako nga gamo.”

Sa interview sang RMN Iloilo kay Nonoy, ginpahayag sini nga handa siya nga pakaslan si Inday bangod suno sa iya gusto man nila nga duha ang natabo.

Photo from web

Facebook Comments