Ipadayon karong adlawa sa kagamhanang lokal sa Marawi City ang pag-suspende sa klase gikan sa elementarya hangtud na sa sekondarya tungod sa padayon nga nasinating mga pag-ulan.
Kagahapon pa nagpagawas og advisory si Mayor Majul Gandamra sa pagsuspende sa klase sa nasangpit nga level tungod sa dili maayong dagan sa panahon ug padayon nga pagbundak sa kusog nga ulan.
Apan nagpadayon ang trabaho ilabina sa mga pampublikong buhatan o ahensiya, gawas nalang kung ang lugar kung asa nahimutang ang opisina o kaha ang usa ka trabahante naa nagpuyo sa usa ka dapit nga gilapawan na sa tubig-baha.
Hinoon, miingon si Gandamra nga walay dapit sa Marawi nga gibahaan o kaha milapaw ang tubig-baha.
Walay damyos o casualty nga nataho sa padayon nga paghapak ni Tropical Depression Falcon sa Northern Mindanao.
Apan sa Lanao del Norte, padayon nga nag-antos sa taas nga tubig-baha ang lungsod sa Lala, nga mi-resulta sa temporaryong pagbakwit sa gatusan ka mga pamilya.
Lakip ang simbahan sa Barangay Maranding, nasudlan na usab sa taas nga level sa tubig-baha.
Sa tapad nga lungsod sa Tubod, subling naguba ang tulay sa may Barangay Dalama nga mao pa untay pagka-ayo human kini maguba sa Bagyong Vinta niadtong tuig 2017.
Walay natahong casualty sa maong panghitabo.
Wala pay gipagawas nga bana-bana sa damyos ang kagamhanang lokal.
