Molave, Zamboanga del Sur – Dakpan na ang suspetsado sa pagpangluba sa gipahigayon nga Hot Pursuit Operation sa kapulisan sa Molave kaniadtong Sabado sa may alas 6 ang takna sa gabie sa Brgy. Blancia, Molave, Zamboanga del Sur.
Ang dinakpan mao si Jerry Calapis Blancia, 39 anyos ug residente sa Brgy. Blancia, Molave, Zamboanga del Sur.
Ang maong pagpangluba nahitabo kaniadtong Sabado sa may alas 4 ang takna sa kadlawon sa Merkado Publiko sa Molave atbang sa Delante’s Bakery. Ang biktima naila nga si Ronnie Castro, 38 anyos ug nakaplagang duguan sa mga mirespondeng kapulisan apan duna pay kinabuhi ug dali kining gidala sa balay-tambalanan sa Blancia, Molave apan gi deklara kini sa doctor nga dead on arrival.
Matud pa mga nakasaksi sa maong paghitabo, ang biktima lango sa ilimnong makahubog , nagmaoy kini ug nanghagit ug away ngadto sa mga tawo ug motorista nga nangagi sa maong dapit. Ang suspetsado sakay sa iyang HONDA XRM 125 color itom gusto mopalit ug pan sa Delante’s Bakery, gipahunong sa biktima ug gihagit ug away. Ang suspetsado milikay sa biktima apan misudya kini sa suspetsado. Hangtud nga ang suspetsado miabre sa U-box sa iyang motor ug mikuha sa kutsilyo ug sa walay duhaduha midunggab sa biktima sa makadaghang higayon nga miigo sa iyang dughan. Nakaangkon ug 3 ka samad nilubaan ang biktima nga miigo sa iyang gusok. Human niini, ang suspetsado daling misibat paingon ngadto sa Barangay Dalaon, Molave, Zamboanga del Sur.
Daling mipahigayon ug Hot Pursuit Operation ang kapulisan sa Molave ug miresulta kini sa pagka aresto sa suspetsado. Sa pagkakaron ang dinakpan temporaryong gipaslak sa Molave Municipal Police Station lock up cell alang sa tukmang disposasyon.
