SUV nga ginasakyan sang anti mining kag human rights lawyer nga Atty Cris Heredia, anak sini kag kliyente, gin-ambush sa Brgy Malapad Cogon, Sigma, Capiz!

Sigma, Capiz – Isa ang pilason sa natabo nga pagsunod kag pagpa-arak sang luthang SUV nga ginasakyan nanday Atty Cris Heredia kaupod ang anak sini nga babaye kag kliyente nga membro sang militar pasado alas 11 sang aga sa Barangay Malapad Cogon, Sigma, Capiz. Daplis nga pilas liog ang naangkon sang kliyente ni Heredia samtang masuwerte naman nga wala ang mga ini nasalabat sang bala matapos nga paarakan sang luthang sang mga gunmen nga nakasakay sa motorsiklo.
Sa interview sang news team sang dyVR RMN-Roxas, ginsiling ni Atty Heredia nga halin ang mga ini sa hearing sa kaso sang iya kliyente sa banwa sang Dao kag pauli na. Pag-abot sa nasambitan nga lugar, nakabati ang mga ini sang indi magnubo sa anum ka mga lupok sang pusil.
Nag-angkon sang pila ka igo sa natuo nga porsyon sang backseat ang amo nga salakyan sang abogada.
Nagapati si Heredia nga halin sa hearing ginsunod ang mga ini sang mga gunmen.
Aminado man ang anti mining kag human rights lawyer nga makapila na siya ka beses nakabaton sang mga pamahog.
Padayon pa ang imbestigasyon sang mga otoridad sa amo nga insidente.

Facebook Comments