Davao City – Kitang tanan man tingali gibati’g kalipay sa mando ni Pres. Rodrigo Duterte nga tun-an ang usa ka across-the-board salary increase ingon man ang posibleng pagpasaka sa daily minimum wage pananglit kining suhestiyon nga P750 matag adlaw nga kita.
Apan gawas sa usbaw sa suholan, gikinahanglan usab nato nga maningkamot sa atong kaugalingon inay nga magsalig lamang kita diha sa gobyerno.
Sa atong indibidwal nga lebel, angay natong himoong kostumbre o batasan ang pagsakripisyo, pagdinaginot ug pagtipig ug salapi kun savings bisan gamay aron aduna kitay kuoton panahon sa krisis ug kawad-on.
Gawas pa niana, responsibilidad sa matag ginikanan nga limitahan ang gidak-on sa ilang tukoron nga pamilya sanglit dili baya komedya ang tahas sa pagmatuto sa atong mga banay: Pagkaon, pagpa-eskwela, disenteng panimalay ug pamiste, pagpa-doktor kun magkabalatian ug uban pa.
Oo, maanindot ang laraw nga usbaw sa suholan apan kun paturagas usab kita sa atong limitadong rekursos usahay ubanan pa gyud sa bisyo, dili gihapon kita makalingkawas gikan sa pagkahigot sa tumang kalisud ug kapobrehon.
Anaa sa atong mga kamot ang panagway sa atong kaugmaon.
RadyoMaN June Duterte
