Ginakabig nga kritikal ang syam ka mga barangays sa syudad bangud sang mataas nga kaso sang covid 19 kag halos may bag-o nga kaso kada adlaw sa sulod na sang 11 ka adlaw.
Bangud sini ginpaidalum sa household lockdown ang mga puluy-an sa sini nga mga barangay kun sa diin may myembro nga positibo sa covid-19.
Nagapanguna sa listahan ang North San Jose, Molo nga may 35 na ka kaso kag ginasundan sang Bo. Obrero, Lapuz kag Cubay, Jaro nga may tag 21 ka kaso.
Nagasunod ang Calumpang Molo, Tabuc Suba Jaro kag San Isidro Jaro nga may tag 16 ka kaso.
May 15 naman ka kaso ang South Fundidor Molo, Balabago Jaro kag Baldoza La Paz nga may tag 15, 14 kag 13 ka kaso.
Base sa bag-o nga guidelines sang covid-19 team sang syudad, ginapaidalum sa lockdown ang puluy-an nga may isa ka ukon masobra pa ka kaso sang covid-19.
Sa pihak sang nagadamo nga kaso sang covid-19, nagbalik na sa kinaandan nga flag ceremony ang syudad apang 50% lamang ang nagatambong.
Sa iya mensahe ginsiling ni mayor Jerry Treñas nga indi makasarang ang syudad nga magpabilin sa lockdown bangud madamo sang dapat padayunon nga trabaho ang gobyerno ilabi na sa pagpangita sang pondo.
Pahanumdom sang alkalde, sundon lang ang husto nga health protocol sa sa tanan nga ti-on.
