Pagadian City – Mipagawas si Pagadian City Mayor Sammy Co ug Executive Order No. 14 nga nagdeklara sa dakbayan nga ilalom na sa State of Local Public Health Emergency gumikan sa paspas nga pagkuyanap sa makamatay nga Coronavirus Disease o COVID-19.
Subay niini, estriktong gimando sa nasangpit nga Executive Order ngadto sa tanang buhatan sa gobyerno, mga pribadong kompanya, tulunghaan, establisimento ug lakip na ngadto sa tanang mga Pagadianon ang pipila ka mga aktibidad nga gidili isip paglikay nga makasulod ang maong virus.
Suspendido ang tanang dinagko nga panagtigom sama sa seminars, workshops, seremonyas ug uban pa.
Gimanduan usab ang matag buhatan sa gobyerno lakip na ang pribado, mga business establishments, restobars, beauty salons, nail spa, barber shops, puneraria, ospital, clinic ug simbahan nga e sanitize ang mga gamit sulod niini sama sa bangko, lamesa ug uban pang galamiton sulod niini.
Ang tanang security guard, receptionist, waiters, front desk personnel, mga barber, hair stylist, salesmen, salesladies ug cashiers gikinahanglan nga magsuot ug face masks sa tanang panahon.
Sa mga restobars, videoke bars, night clubs, live band ug uban pa wala na usab gitugutan nga magtagay-tagay sa ilimnon.
Ilalom gihapon sa maong kamanduan, wala nay GROs, singers o entertainers nga makatapad sa mga customers.
Gipaundang na usab ang operasyon sa tari-tari ug susamang aktibidad. Sa mga haya, kinahanglan dili molapas sa 40 lamang katawo ug gidili na ang pagsugal.
Panawagan sa mayor ngadto sa tanang Pagadianon, nga magrelax ug dili magpanic ug dili motoo sa fake news.
