SYUDAD sang Iloilo – Pareho nga wala nakacomply sa Zero Open Defecation (ZOD) status ang syudad sang Iloilo kag Bacolod.
Sa data sang Department of Health (DOH) sa 180 ka barangays sang syudad sang Iloilo kag 61 sa syudad sang Bacolod, wala gid sang bisan isa nga nakacomply sang Zero Open Defecation (ZOD).
Ini nagakahulugan nga tanan nga mga barangay sang syudad may ara pa nga panimalay nga wala sang sanitary nga kasilyas.
Suno kay Dr. Sophia Pulmones, chief sang Local Health Support Division sang DOH Region 6, ini ang base sa ila record as of September 15, 2019.
Samtang sa bahin sang mga probinsya may pinakamataas nga porsyente sang ZOD ang Capiz nga may 75.5% ukon 355 gikan sa 473 ka barangays kag 11 naman ka banwa.
Nagasunod ang probinsya sang Iloilo nga may 67.64% ukon 1,164 gikan sa 1,721 apang wala sang ZOD nga banwa.
Nagasunod diri ang Antique may 39.15%, Guimaras may 22.45%, Aklan may 11.62% kag Negros Occidental nga may 4%.
Ginpahayag ni Dr. Jessie Glen Alonsabe, Regional Epidemiologist nga importante ang matinlo nga kasilyas bangud ang higko sang tawo ang nagadala sang mga kagaw nga nagatuga sang balati-an kaangay sang polio.
Bangud sini ginapanugyan ni Alonsabe sa mga LGU nga magpasar sang ordinansa nga makaamat-amat dula sang open defection sa ila nasakupan.//via Joel Franco reports
