SYUDAD sang Iloilo – Nagakinahanglan karun ang Iloilo City Government sang dugang nga medical personnel agud mag augment sa ginahimo nga preventive measures sa nagataas nga kaso sang dengue.
“We need P3-million or P1-million a month to pay for the services of additional 10 doctors, 78 nurses and 12 medical technologists to cater to increasing dengue patients and address the alarming health problem,” ang pahayag ni Mayor Jerry P. Treñas.
Madumduman, ginpaidalum na sa state of calamity ang syudad sang Iloilo santu man sa rekomendasyon sang City Disaster Risk Reduction Management Council (CDRRMC).
Bangod sini, mahimo na magamit sang syudad ang P34-million Quick Respond Fund para sa pagbakal sang equipment kag P5-million maintenance and other operating expense trust fund sang 2018 para sa hiring sang dugang nga personnel.
Magabakal ang Iloilo City Government sang sprayers para sa misting, fogging machines, kag chemicals nga ihatag sa 68 ka public schools kag 180 ka barangays nga sakop sang syudad.
Sa record sang Iloilo City health Office as of July 20, 2019, naglab-ot na sa 1, 119 ang nabalhag nga dengue cases sa syudad.
Mas mataas ini sang 462.3% kon ikumparar sa kaangay nga period sang nagligad nga tuig.
via Iloilo City Government
