TACLOBAN CITY – Magastos an gobyerno hin nagkakantidad 1.32 bilyon pesos para han pagpa-ayos han pito nga airport dinhi ha Sinirangan Bisayas yana nga tuig, ini an ginkompirma han Civil Aviation Authority of the Philippines (CAAP).
Sumala kan CAAP Eastern Visayas Area Manager Danilo Abareta, pauupayon an mga airport para masiguro an safety ngan pagsunod naman liwat ini han aviation standards.
An budget yana nga tuig para han Airport Development in doble ha 684 milyon pesos dida han nakalabay nga tuig 2017.
An dako nga pondo yana nga 2018 in para ha site development ngan pagtindog hin bag-o nga terminal building para ha Tacloban Airport na may alokasyon nga kwarta nga nagkakantidad 716.12 milyon pesos.
Ha pagkakamayada 34 nga inbound ngan outbound daily flights, panpito an Tacloban Airport ha pinaka damo nga pasahero nga airport nga may 1.2 milyon ka tawo dida han nakalabay nga tuig.
