TACLOBAN CITY – Tungod han nagtitikadamo nga populasyon ngan sugad man han pagdamo han ginpapadangat nga mga reklamo ha kapulisan parte han pangawat ngan iba pa nga mga krimen ha Northern barangay ha syudad han Tacloban, nag-desisyon an Tacloban City Police Office nga magbutang hin police station ha Norte ngan ini in tatawagon nga Police Station 3.
Kakulop han kulop gindumara an Ground breaking ceremony ha Brgy. Tagpuro Tacloban City kun diin ig-titindog an mao nga Istasyon.
Ini in gin-atendiran ni Tacloban City Mayor Cristina Romualdez, PRO8 Regional Director Gilberto Cruz, TCPO Director Rolando Bade ngan iba pa nga mga stakeholders.
Sumala kan PCInsp. Rex Cantillep, mahitungod nga pira pa ka-kilometro an distansya han Police station 2 Abucay ha Northern Brgy in diri dayon na-rerespondihan han mga kapulisan an mga ginpapadangat nga mga panhitabo ha Norte.
Ha pagkayana in natikangan na an pag-construct han mao nga Police station 3.
Magtitikang naman an gagamiton nga mga materyales ha PNP Regional Office 8 ngan bubuligan gihapon han City Government han Tacloban.
Dugang pa han opisyal, nag request na hi City Director Bade ha PNP Regional Office 8 hin kadugangan nga PNP personnel nga magdudugang ha panginahanglan han mao nga Police station 3.
