TACLOBAN CITY – Diri na mga enforcers han Traffic Operation Management Enforcement and Control Office (TOMECO) an nakapot yana han downtown area han Tacloban.
May bag-o nga mando yana hi Tacloban City Mayor Cristina Romualdez nga an Task Force Kanhuraw na an makapot han downtown area ngan mag-iimplementar hin balaod ha trapiko,mandadakop hin mga pasaway nga driver ngan iba pa nga ordinansa han syudad.
Pero ano naman la an hihimuon han TOMECO?
Ha interview han RMN ha tagapagyakan han TOMECO nga hi Jobs Lagutan, nalilipong an ira ulo kun ano nala an ira trabaho kay pati an ira mga enforcers in ginpabalhin na ngadto ha Task Force Kanhuraw.
“It natatabo sugad hit iyo maoobserbaran baga hin ginsarangkapanan naman la liwat, hasta kami in baga gin-ichapwera nala.”
“Nagpadara kami hin tawo ngadto ha ira [Task Force Kanhuraw] pero gin-angkon liwat ini nira. Diri lugod maaram it amon mga tawo kun hin-o ba talaga iton ira mga agaron.”
Sobra 100 iton empleyado han TOMECO samtang an Task Force Kanhuraw naman in sobra 60, kaurugan nga tawo in tikang ha TOMECO.
An bag-o yana nga mando ha TOMECO in magbantay nala han trapiko ha gawas han downtown.
Karuyag sidngon ba hini in diri epektibo iton pagbantay han TOMECO ha problema han trapiko ha downtown?
Dugang ni Lagutan, bangin lugod hira magkamayada misencounter kontra ha Task Force Kanhuraw.
“It amon baga kinukulbaan hini bangin kami magkamayada misencounter.”
An Task Force Kanhuraw hin nag-iissue na gihapon hin citation ticket ngadto ha mga traffic violators, diri na an TOMECO.
Pero may bwelta an TOMECO.
“Diri basta-basta bis hin-o nga member han Task Force Kanhuraw makaka-issue han citation ticket unless otherwise mayada deputation order nga ginkakaptan from the enforcement office.”
Dugang ni Lagutan, an gingagamit nga citation ticket han Task Force Kanhuraw in Environmental Sanitation Citation Ticket, diri mismo an official citation ticket han trapiko.
Ha ginpadara nga mensahe han Head han Task Force Kanhuraw nga hi Eugene Ramirez, waray mahihimo iton TOMECO kay tikang ha labaw an bag-o nga mando. Diri man liwat daw nakikipag-kompetensya an Task Force Kanhuraw ha TOMECO kundi nabulig para masolusyunan an problema han trapiko ha syudad.
(Photo: Tacloban City Information Office)
