Davao City – Mapasalamaton ang mga residente gikan sa mga sikbit nga barangay sa halapad nga plantasyon sa Tagum Agricultural Development Company, Inc. (TADECO) tungod sa pag abli sa DPWH- Davao Del Norte sa ilang mga naandang dalan sulod sa sagingan.
Nagkumbuya ang PNP Davao Del Norte, DPWH , DENR ug office of house speaker sa House of representative aron ablihan ang mga dalan nga gisirhan sa TADECO nga maoy agianan padulong sa Barangay Tulalian, Bugtung Lubi, Balagunan, Bobongon ug Tanglaw.
Gikan sa National Highway padulong sa munisipaliad sa Sto. Tomas makita sa gate sa plantasyon nga adunay mga barikada ug gwardiya nga musita sa mga muagi pasulod sa plantasyon padulong sa mga sikbit nga kabarangayan.
Nagmalampuson kaganiha ang mga ahensya sa kagamahanan sa pagbukas sa maong mga agianan aron mas duol nalang sa mga residente ang pagsulod gawas sa ilang mga Barangay tadlas sa mga Barangay road nga anaa sulod sa plantasyon.
Apan gipaklaro ni Atty. Nicholas Banga legal counsel sa Tadeco nga dili iya sa publiko ang maong mga dalan tungod kay reservation ang maong lugar nga arkilado sa TADECO ngadto sa Bureau of Corrections.
Nahukman kuno nga i off limits una sa mga tawo ang mga dalan nga mitadlas sa sagingan sa dihang naigo sa peste ang plantasyon sa TADECO aron mas mapadali ang pag patay sa mga peste nga miataki sa saging.
Kahinumduman nga mi-petisyon ang mga lumulopyo sa mga apektadong Barangay tungod sa kalayo na sa ilang agian hangtud nga miabot sa kongreso ang ilang reklamo ug kini giaksyonan gilayon.
RadyoMaN Erin Lumosbog
