Pilar, Capiz – Patay na sang masapwan ang isa ka 40-anyos nga persona mga alas 8:00 kahapon sang aga sa boundary sang Barangay Cayus kag Barangay Olalo, Pilar, Capiz. Ginkilala ang biktima sa kay Jimmy Pastrana y Undag sang Barangay Olalo, banwa sang Pilar. Nag-angkon sang madamo nga igo sang bala sa lawas si Pastrana nga amo ang gintunaan sang iya kamatayon.
Base sa inisyal nga imbestigasyon sang Pilar PNP, pila sa mga residente sang nasambit nga duog ang nakabati sang sunod-sunod nga lupok sang armas luthang sang nagligad nga gab-i, kag sang aga na, nasapwan na lamang ang dugu-on na nga lawas sang biktima.
Magapauli na kuntani ang biktima sakay sa iya motorsiklo, apang pag-abot sa taklaron nga bahin sang Barangay Olalo, gintambangan kag ginluthang ini sang makapila ka beses sang ginapatihan duha ka mga suspek.
Narekober sang kapulisan sa lugar nga ginluntaran sang krimen ang 3 ka empty shells sang .45 pistol kag 4 ka empty shells sang 12 gauge shotgun. Nagapadayon sa gihapon ang imbestigasyon sang mga kapulisan agud hibaluon ang may kahimu-an sang krimen kag ang motibo sang pagpatay kay Pastrana.
