Pagadian City – Mokabat sa kapin kon kulang usa ka gatus mil pesos ang nadala sa mga suspetsado sa nahitabong tulis alas 7:30 kagabie sa partikyular sa Annie’s Grocery, Datoc St., Sta Lucia, Pagadian City.
Ang biktima mao si Antonio Ong Luis, hingkod ang panuigon ug tag-iya sa maong grocery store.
Sa imbestigasyon sa Pagadian City PNP nasayran nga pasakay na unta ang biktima ngadto sa iyang sakyanan SUV-Montero Sport apan sa kalit usa ka wala mailhing lalaki ang mituslok sa iyang kilid pinaagi sa calibre 45 nga armas ug mideklarang tulis.
Nalabni sa suspek ang bag sa biktima nga gibana-banang adunay sulod nga usa ka gatus mil pesos (P 100,000) kapin kon kulang.
Human niini, mipabuto pa ang laing suspek sa iyang armas ponting ngadto sa Brgy Balangasan nga sakop ning syudad.
Nasayrang usa ka saleslady nga nailang si Mayflor Intong Onduran, 31 anyos ug taga Prk Bonifacio, Sto Niño, Pagadian City ang naigo sa saag nga bala kinsa niadtong panahona nakapwesto sa 2nd floor bldg duol sa Lady’s Mart building.
Ang saleslady ang nakaangkon ug samad sa iyang too nga kamot resulta sa saag nga bala ug daling nadala sa Zamboanga del Sur Medical Center.
Niining kasamtangan, nagpahigayon na ang detective ug intelligence personnel og follow-up operation batok sa mga responsable sa maong pagpanulis.
