BACOLOD CITY – Liwat nga nagpakitang gilas ang mga “hurikap” girls sa plaza sang Bacolod, taga Cebu ila ginbiktima kagab-i.
Ang biktima isa ma 41 anyos nga lalaki, tumandok sang Brgy. Basac, Cebu.
Suno sa biktima nga may mga las 8:45 kagab-i, Setyembre 16 sa corner sang Gatuslao-Gonzaga Street malapit sa area sang Bacolod City Public Plaza, ini siya ang nagatindog agud maghulat sang taxi para kuntani magpauli na sa iya boarding house.
Siling niya may nagpalapit sa iya nga duha ka wala nakilala nga mga babayi halin sa plaza kag nagtanyag sa iya sang “short time” kadungan sa paghurikap sa biktima.
Pahayag sang biktima nga wala niya ginsapak ang amo nga mga babayi gani naglakat na lamang ang mga ini, apang nakibot siya nga bukas na ang iya sling bag kag wala na ang iya cellphone nga nagabalor sang kapin P7,500 pesos.
Nagapati siya nga ang duha ka mga babayi nga nagpalapit sa iya amo ang nagkuha sang iya cellphone./dyHB BACOLOD
