Dipolog City-Sa miaging adlaw gihimo ang pagdungog may kalabot sa sitwasyon karon sa bugas dinhi sa probinsya sa Zamboanga del norte, ilabi na nga nagka guliyang na ang mag tawo tungod sa padayon nga pagtaas sa presyo sa bugas.
Ang maong panagtigom gitambungan mismo nila ni Vice Gov. Senen O Angeles, Dipolog City Mayor Darel Dexter T. Uy, Rice Retailer Association-ZN Hon. Patri B. Chan, Personahe sa DA, DTI ug ni NFA-Dipolog Prov’l Operation Officer Marilu Sybico.
Rason sa maong panagtigom gihisgutan ang kalabot sa stocks sa NFA rice ug ang presyo sa bugas sa merkado.
Ingon pa ni NFA officer Marilu Sybico, wala na’y stocks sa ilang warehouse, pero adunay gipaabot nga 180,000 ka sako nga imported rice para sa Zamboanga peninsula ug 7,500 ka sako ang gi alokar para dinhi sa probinsya sa Zamboanga del norte ug lauman mahidangat na karong adlawa o sa katapusan ning bulana.
Usa sa gimulo karon sa katawhan dinhi sa dakbayan sa Dipolog ug sa tibuok probinsya sa Zamboanga del norte ang grabe ka taas nga presyo sa bugas humay bisan paman ang bugas mais.
Mao kini karon ang gitutukan sa taga DTI ilabi kadtong wala nagsunod sa saktong presyo, pero butyag ni DTI Prov’l dir. Maridel Dengal nga nagsunod man ang mga negosyante sa SRP ilabi na kadtong mga de lata ug mga basic commodities.
Sa habig usab sa DA- Zamboanga del norte pinaagi ni Engr. Jose Kerr N. Porlas lauman nga dili na kaayo magmahal ang bugas ilabi na nga nagsugod na ang ting ani sa humay dinhi sa probinsya.
Ang ila lang ikapaniguro nga dili gayud mahutadan ug bugas ang probinsya ug padayon sila nga mosuporta sa mga mag uuma para maka produce ug de kalidad nga bugas sa probinsya.
