Davao City – Nagpahigayon karon ang Barangay Lasang, Davao City og tagging sa tricycle ug trisikad drivers nga fully vaccinated na batok Coronavirus Disease 2019 (COVID-19).
Sa interbyu sa DXDC RMN Davao kang Kapitan Allan Simo-ag sa Barangay Lasang, gibutyag niini nga kini nga inisyatibo sumpay sa gihimo usab nga house-tagging sa mga bakunadong mga residente sa barangay niadtong bulan sa Hulyo karong tuiga.
Gipasabot ni Simo-ag, makatabang ang maong tagging aron masayran sa publiko kung kinsa nga mga anaa sa transport sector ang bakunado na batok COVID-19 diin target sa barangay ang 150 stickers alang sa maong inisyatibo.
“At least, magiyahan pud ang atoang mga katawhan og kinsa lay mga driver nga fully vaccinated na (batok COVID-19). Unya ma-check ug atoa silang maengganyo nga magpabakuna na labi na kay naa sila sa gawas, vulnerable sila. Nagapasakay sila og pasahero, kinahanglan nila nga maproteksyonan ang ilahang kaugalingon ug ingon man maproteksyonan nila ilahang mga pasahero,” saysay ni Simo-ag.
Giklaro ni Simo-ag, wala gidid-an nga mubiyahe kun mamasahero ang mga wala pa nabakunahan diin girason usab sa pipila ka drivers ang pagbaton og balatian ug gi-abisohan nga magpa-check up samtang ginaedukar kadtong wala pa nakadesisyon nga magpabakuna batok COVID-19.
RadyoMaN Kirby Manzon
