Davao City – Dili angay kahadlokan ang syudad sa Tagum nunot sa nahitabong sunod-sunod nga pagpamatay sa milabay’ng mga adlaw.
Kini human sagad reaksyon sa mga netizens nangahadlok mubisita gumikan sa nahimong sitwasyon karon sa syudad diin upat ang natalang patay sulod sa usa lamang ka semana.
Sumala ni Tagum City Police Office Spokesperson Capt. Anjanette Tirador nga usa lamang ka isolated cases ang nahitabo sa ilang dakbayan.
“Ang mga insidente kasagaran nahitabo sa inner parts sa city sama sa dunggab sulod sa inn where dili ta makaingon nga naay police sa sulod nga mag secure,” segun niini.
Gipaniguro ni Tirador nga bisan sa kakulangon sa ilang personahe diin sa matag usa ka pulis mubantay sa 1,800 ka constituents, ilang pakusgan ug pahugtan pa ang security measure sa maong lugar.
Samtang sa laing interbyu kang PRO-XI spokesperson Maj. Jason Baria, gisugilon niini nga safe place gihapon ang Tagum gani gipahugtan ang pag implentar usab og checkpoints.
Gi-awhag usab ni Baria ang katawhan nga makig alayon kanila kung adunay mamatikdang kadudahang lihok ingon man ang mga ahente sa nasarado nga investment firms kung adunay hulga nga madawat.
RadyoMaN Jason Amisola
