Sa interbyu sa RMN Davao kang PLtCol Edgardo Bernardo, Tagum City Police Office Station Commander, gibutyag niini nga dili konektado ang duha ka mga insidente.
Sumala ni Bernardo, aduna na silay suspek sa pagpanlugos patay sa 9 anyos apan dili usa nila ipagula ang identity niini sa publiko tungod nagpadayon pa ang ilahang pagsolbad sa maong kaso.
Kahinumduman nga na-missing ang menor de edad og pila ka adlaw gikan og hatod sa iyahang igsuon sa eskwelahan ug nadugta na ang patayng lawas niini human makit-an sa kasagbutang bahin sa may Purok Durian, Apokon, Tagum City.
Positibong nahilabtan ang menor de edad base sa resulta sa awtopsiya ug aduna kiniy samad sa ulo nga hinungdan sa iyahang kamatayon.
Gibutyag niini nga una mahitabo ang krimen nisulay pa ang suspek og pagpambiktima sa laing duha pa ka mga hamtong na babae.
Gilubong na ang bata niadtong nakalabayng adlaw.
Sa pikas bahin, matud sa hepe nga gikatakdang i-awtopsiya ang patayng lawas sa 18 anyos nga si Nike Andy Riana Kassim kinsa napalgang wala nay kinabuhi niadtong Abril 24, 2023 pasado alas-1:20pm sa Purok Pine Tree, Magugpo North, Tagum City.
Adunay person of interest ang kapulisan ug posibleng kaila ra sa dalagita ang suspek.
Panawagan ni Bernardo sa publiko partikular na sa mga kababayenhan nga magigmat kung maglakaw-lakaw man sa kadlawon.
Subay niini, gipakusgan sa kapulisan sa Tagum ang pagpatrolya sa mga kadalanan.
Niapelar usab kini sa mga Barangay Kapitan nga mutabang sa mga kapulisan sa pagbantay sa seguridad aron mapugngan ang mga krimen nga matigayon.
RadyoMaN Aimee Guinita
