Davao City – Giingong napasagdan nga niluto ang hinungdan sa sunog sa Purok 8-B, Brgy. Magdum, Tagum City kagahapong adlawa, May 26, 2019 nga miugdaw sa 31 ka mga balay.
Sa pakighinabi sa DXDC RMN Davao kang FO1 Michael Pagaran sa Bureau of Fire Protection kun BFP-Tagum, butane canister nga adunay sulod nga LPG ang gigamit sa pagluto nga napasagdan.
Dugang pa nga gibana-banaang anaa sa 1.5 million pesos ang natalang damyos sa maong insidente diin ang sunog nagsugod bandang alas 5:52 sa hapon ug nadeklarang fire out alas 7:20 sa gabii.
Samtang, nagpabilin sa tulunghaan sa maong brgy. ang mga apektado sa sunog ug nanawagan og hinabang.
Subay niini, subling nagpahinumdom ang BFP ngadto sa publiko nga likayan ang paggamit og gitawag nga takal-takal kun ginatawag sa katawhan nga butane nga adunay sulod nga LPG.
“As much as possible, avoid mugamit og ‘takal-takal’ among tawag ana kay di na man na siya butane kay ang pure butane mapalit man na sa mall, tag 60-70 pero katong tag 20-25 pesos nga ginatuohan nato nga butane, dili na siya butane, LPG ang sulod ug delikado na siya”, segun ni Pagaran.
RadyoMaN Renz Barbarona
