Davao City – Nagdumili karon og kumpirma ang Department of Interior and Local Government (DILG)-XI kung ang serye ba sa kamatay sa Tagum City konektado o dili sa isyu sa investment schemes.
Sa interbyu sa DXDC RMN Davao kang Alex Roldan, Regional Director sa DILG-XI, gibutyag niini nga aduna may pagduda nga naay koneksyon ang krimen sa isyu sa investment schemes apan hangtud nga wala pay kumpirmasyon gikan sa otoridad, dili pa hingpit makumpirma kung konektado ang duruha.
“Kung atong tan-awon kining mga krimen dinhi sa atong lugar, mura’g dili man siya matawag natong dali nga makonektar sa mga miaging mga sitwasyon sama pananglit sa kadtong mga investment scam until such time nga ang kapulisan makahatag og iyahang klarong pagsusi ug pagsubay,” saysay ni Roldan.
Kahinumduman nga sunod-sunod ang mga insidente sa pagpamusil-patay sa Tagum City diin mi-abot og upat ka ‘shooting incidents’ ang natala sulod lamang sa usa ka semana.
Nagpahimangno usab ang DILG-XI Regional Director sa publiko nga magmabinantayon pirmi ug kanunay nga makig-alayon sa otoridad.
RadyoMaN Kirby Manzon
