Roxas City, Capiz- Sa ikatatlo ka beses, liwat naman nga ginbulabog sang bomb threat ang talatapan sang Bureau of Internal Revenue sa Roxas City kahapon nga adlaw.
May kaangut sini, insigida nga ginpaguha sa building ang mga empleyado.
Nahibaluan nga nakabaton ang isa sa mga empleyado sang BIR sang text message nga ginapaalerto ang mga ini bangud may yara sang presensya sang bomba sa lugar.
Insigida naman nga nagresponder ang mga kapulisan sang Roxas City PNP, PDRRMO kag Roxas City Fire Station nga amo naman ang nagkordon sa lugar samtang ang team sang K9 unit sang Philippine Coast Guard amo ang naghalughog sa palibot kag sulod sang BIR office.
Matapos ang pila ka minutes nga pagtsekyar, gindeklarar nga wala sang presensya sang eksplosibo sa talatapan sang BIR.
