Labangan, Zamboanga del Sur – Padayong gipangita sa kapulisan ang tulo ka mga lalaki nga nakasibat sa gipahigayon nga operasyon police opeartion batok sa illegal nga sugal didto sa Barangay Lower Pulacan, Labangan, Zamboanga del Sur alas 4:30 kagahapon sa hapon.
Gironda sa tropa sa Labangan Municipal Police Station ang maong lugar pinaagi sa pagpanguna ni POLICE MAJ. JEROME PAMALARAN dihang nakadawat og impormasyon nga dunay naghantag taliwala sa implementasyon sa General Community Quarantine apan nakasibat ang mga target nga sugarol dihang nakamatikod sa presensya sa otoridad.
Gamit nalang sa sugal nga hantak ang na-abtan sa kapulisan sama sa tulo tagpiso nga sinselyo, lingon ug lapad nga bato nga maoy tugpuan sa tulo ka peso ug pusta nga mobalor sa 270.00.
Apan bisan ug naka-ikyas ang mga suspek malampuson nailhan ang ilang identipikasyon nga sila si Felipe Labora “aka EPE”, Pablito Caylan “aka Pabing” pulos taga-Barangay Lower Pulacan, Labangan ug usa pa ka kauban ang padayong gisuta ang pangalan.
Naglusad na og follow up investigation ang kapulisan alang sa pagpaniid ug pagdakop sa mga sugarol nga naka-ikyas.
Tags;DXPR,DXPR603,Pagadian City,Gambling
