Davao City – Mahinungdanon kaayo ang pagpahigayon sa mandatory drug tests sa tanang mga personahe sa gobyerno kun sa serbisyong sibil.
Sa interview sa tulumanong ‘Straight to the Point’, gisugilon ni University of Mindanao – Institute of Public Opinion (UM-IPO) executive director Dr. Adrian Tamayo nga maayo ang ehemplong gipakita ni Mayor Inday Sara diha sa paghingilin sa tulo ka mga empleyado sa kagamhanang lokal kinsa napalgang positibo sa gipahigayong random drug tests niadtong nilabay’ng semana.
Hinono-a, gitin-aw ni Tamayo nga daw usaka ‘symbolic act’ lamang ang aksyon sa alkalde sa syudad sa Davao sanglit pagpakita lamang kini nga determinado ang atong lokalidad nga ipatuman ang hugot nga kampanya versus droga ug kini manukad diha mismo sa nataran sa city government.
Dugang sa UM academic nga wala pa nato maabot ang ‘ideal rehabilitation scheme’ gumikan padayon pa kita sa paglawig dinha sa ‘transition stage’ gikan sa law enforcement emphasis sa ‘war on drugs’ pinaagi sa ‘Oplan Tokhang’ ngadto sa mas halapad nga drug rehabilitation alang sa mga nabiktima sa droga.
Husto usab si former Dangerous Drugs Board (DDB) chief Dionisio Santiago nga angayang ipahimutang ang mga drug rehabilitation facilities hadu-ol sa pamilya sa mga drug rehab patients sanglit kritikal ang papel sa mga paryente diha sa malampusong drug treatment, ang apan lamang gumikan sa negatibong impresyon mismo sa pamuno-nasud sa istilo sa pamahayag sa maong opisyal, segun kang Tamayo.
Si Santiago gi-dismiss ni Pres. Duterte gumikan sa maha-it nga mga statement niini kalabot sa Mega Drug Rehab facility nahimutang sa Nueva Ecija nga gidonar sa pribadong sektor ngadto sa gobyerno.
Matud sa kanhi hepe sa DDB, ‘miscalculation’ ang lokasyon sa maong pacilidad gumikan sa halayo nga lokasyon niini gikan sa mga prospective rehab patients.
RadyoMaN Jason Amisola
