Davao City – Dili magmalampuson ang pagbuntog sa kriminalidad kun magtinagsa kita sa pagpukan niini kon dili labaw’ng gikinahanglan nga malangkubon kun tinibuok nga istilo kun istratehiya ang atong sagopon ug i-adptar.
Sa pakighinabi kang University of Mindanao – Institute of Public Opinion (UM-IPO) executive director Dr. Adrian Tamayo, iyang gisulti nga masulbad lamang nato ang krimen kun ang tanan aktibong mo-partisipar.
Ang ‘point of reference’ ni Tamayo mao ang pagtunol ni Pres. Rodrigo Duterte sa ‘war on drugs’ gikan sa hurisdiksyon sa Philippine National Police (PNP) ngadto sa kamot sa Philippine Drug Enforcement Agency (PDEA).
Samtang gidayeg niini ang propesyonalismong gipakita sa PDEA sa paggukod sa gitawag nga ‘high-value target drug personalities,’ kinahanglan nga mas malangkubon ug komprehensibo ang approach sa mga tinugyanan sa balaud ilabi na nga anaa sa ubos nga ang-ang sa katilingban ang mas dakung presensya sa mga pobreng nahilambigit sa industriya sa iligal nga droga, segun kang Tamayo.
Matud sa academician, gikinahanglan una nga hatagan ug pagtagad ang anaa sa ubos nga bahin kun ‘community level’ o ‘root cause’ sa drug menace.
Base sa ilang research gititulohang ‘Simultaneity of Crime Incidents for the Past Ten Years,’ ninggula ang panglantaw nga aron mas mapadali ang pagwagtang sa kriminalidad, gikinahanglan ang ‘direct sharing of information’ ug ‘stronger border patrol plan’ sanglit adunay klase sa mga krimen nga sa laing dapit nahitabo apan nikagiw ang mga suspetsado busa angayang magtinabangay ang mga awtoridad paglutos sa nasangpit.
Segun ni Tamayo, dili makaya sa PDEA kung sila lamang ang motutok sa drug-related crimes gumikan diyutay lamang ang ilang mga personahe.
Gipasabot sa university research analyst nga kung mahibalik na sa PNP ang responsibilidad sa ‘war on drugs’, gilauman nga mahatagan na ug hustong pagtagad ang suliran sa iligal nga droga pinaagi sa mas halapad nga kampanyang ubanan sa tanang sector sa sosyedad.
RadyoMaN Jason Amisola
