Davao City – Gidasig karon sa apohan sa bata nga namatay tungod sa dengue ang publiko nga gilayong ipa-dengue test ang mga anak, apo o kinsang indibidwal nga nagbaton og kalintura aron malikay sa peligro.
Sa interbyu sa DXDC RMN Davao kang Crisanto Echavez, lolo sa dengue victim nga si Briana Miles Echavez, 9-anyos nga taga Purok 15 Golden Shower, Brgy. Mintal, Davao City gibutyag niini nga ‘dengue severe’ ang balatian sa iyang apo nga sagad mabiktima niini ang mga nag edad og 1 to 10 year old.
“Kung bati-on inyong anak og kalintura, kung mahimo lang daan, ipa dengue test ninyo. Ayaw mo pagsalig nga muingo’g taas og platelet kay ang dengue severe mao nay pinakakuyaw, mukawat og kamatayon. Mao nay pinaka advise sa doktor, sa DOH sa imuha. Gikan sa 1 year hangtud sa 10 years old mao nay ginakuha karon sa dengue severe nga sakit,” saysay ni Echavez.
Nasayran nga usa lamang si Briana Miles sa mga nabiktima sa dengue dinhi sa dakbayan sa Davao.
Sa pagkakaron, gikonsidera na sa City Health Office (CHO) nga anaa sa critical stage ang Davao sa dengue level tungod sa padayong pagtaas sa kaso sa dengue hinungdan nga gipakusgan pa niini ang kampanya aron mabatukan ang maong balatian.
RadyoMaN Kirby Manzon
