General Santos City—Patay ang usa ka suspetsadong target sa Buybust operation sa City Drug Enforcement Unit (CPDEU) human nga nisukol sa operatiba sa kapulisan nga gipahigayon sa Zone 6, Saway, Labangal, Gensan alas 4:50 ang takna kagahapong adlawa.
Suspek giilang si Raymund Alisin, hingkod ang pang-edaron nga residenti sa maong lugar.
Sumala ni Police Chief Inspector Patrich Elma, Hepe sa CPDEU nga samtang gihimo ang operasyon nakamatikod matud pa ang suspek nga pulis ang iyang katransaksyon mao nga nibunlot kini ug pusil dayon gipabuthan ang mga pulis.
Tungod niini napugos ang kapulisan sa pagbalos sa suspek nga miresulta sa kamatayon niini human nga nakaangkon ug samad pinusilan sa iyang nagkandaiyang parti sa lawas.
Nasayran nga narekober gikan kang Alisin ang pipila ka sachet sa gituohang shabu, kalibre 38 nga pusil, mga buhing bala ingon man P500.00 nga marked money.
Nadala pa sa ospital ang suspek apan gideklara kining dead on arrival. Samtang nadala usab sa ospital ang pulis nga si Po2 Elma nga nakabase sa Police Station 2 kansa nakaangkon ug daplis nga samad sa iyang tiil nga bahin.
Si Po2 Elma apil sa operatibang nag-operate batok sas uspek. Sa karon stable na ang kahimtang sa nasampit nga pulis kansa nagpaalim pa sa ospital.
