Roxas City, Capiz – Ginpasalamatan sang panibag-o nga Revenue District Officer (RDO) sang BIR Capiz nga si Nelia Demalata ang mga taxpayer sa bug-os nga probinsya matapos nga nag “exceed” ang BIR sa tax collection target sini para sa bulan sang Enero.
Suno pa kay Demalata nga nag-angkon sila sang kabug-usan nga 118,607,524.04 nga collection mas dako kon ikumpara sa target nga 62,944,000.00 para sa Enero 2018.
Ginhimo ni Demalata ang amo nga pahayag sa ginpatigayon nga media interaction sa talatapan mismo sang BIR Capiz matapos man ang ginpatigayon nga simultaneous unveiling sang TRAIN logo.
Si Demalata ang nagpungko bilang panibag-o nga RDO sang BIR Capiz sang Enero 8 kon sa diin target sini nga maubos sa pagbisita kag ma-edukar ang tanan nga munisipyo sa Capiz may kaangut sa TRAIN(Tax Reform for Acceleration and Inclusion) antes pa man mag-abot ang bulan sang Abril.
