Taman nalang kagahapon, Hulyo 15, ang pagdawat sa Task Force Bangon Marawi og aplikasyon sa mga tag-iya og mga istraktura sulod sa most affected area aron sila mohatag sa ilang consent nga iapil sa demolisyon ang ilang mga balay o building.
Nagpasabot, nga kung walay consent, dili na maapil sa pag-demolish ang usa ka istraktura o balay sa nagpadayon nga rehabilitasyon sa Marawi City.
Target sa gobyerno nga matapos ang debris management o demolisyon sa Nobyembre karong tuiga ug masugdan sa katapusang quarter ang mga vertical projects sama sa underground cable, water system ug uban pa.
Sa Disyembre 2021 ang gitarget sa gobyerno nga makumpleto ang rehabilitasyon sa 250,000 hectare nga most affected area nga gilangkuban sa 24 ka mga barangay sa Marawi City.
Kung dili maapil sa demolisyon sa National Housing Authority ang usa ka gambalay, ang tag-iya maoy mogasto sa pag-renta og heavy equipment, mangita’g isuhol sa mga mohakot sa debris ug mangita’g lugar kung asa ilabay ang ilang mga debris.
Nagkinahanglan pa og permit gikan sa usa ka local government unit ug Environmental Compliance Certificate o ECC gikan sa Department of Environment and Natural Resources o DENR ang si binsa kinsa nga bu-ot molabay og debris.
Kung maapil sa demolisyon sa NHA ang usa ka gambalay, walay gastuhon ang tag-iya niini gawas lang sa paghatag og consent o pagtugot.
