Pagadian City – Nagmugna og hinanaling aksyon ang kagamhanang probinsyal aron mapakgang ang pagsulod sa African Swine Fever kon ASF ug uban pang makatakod nga sakit sa baboy.
Nipasar og ordinansa ang Sangguniang Panlalawigan ug ni-umol og task force nga maoy molantaw sa kinatibuk-ang kalihukan sa lokal nga industriya sa baboy.
Ang ordinansa No. 006-2019 nga gipangamahanan ni Board Member Rogelio Saniel, ang ang naghupot sa Committee on Agriculture and Fishery, naglagda polisiya aron malikayan ang pagsulod sa ASF sa probinsya sama sa strikto nga pagsusi sa mga pig farms, pig holding facilities, mga slaughterhouses, merkado, ug bisan pa ang pagpamaligya sa buhing baboy, karne ug ubang produkto niini.
Nalakip usab sa maong ordinansa ang strikto nga pagpatuman sa animal disease surveillance ug monitoring system sama sa animal quarantine requirement.
Ang Contagious Swine Diseases Task Force kun CSD-Task Force maoy gitahasan sa paglunsad og information campaign mahitungod sa pagpakgang sa ASF lakip na ang paghimo sa mga regulasyon.
Dugang pa niinin, ang task force makigkutay ngadto sa Bureau of Animal Industry, Department of Agriculture, ug uban pang ahensya aron mapatuman ang siyentipikong pamaagi sa pagkontrolar sa maong sakit sa baboy.
Base ordinansa, gidili ug illegal ang pag-byahe sa mga baboy ug uban pang pork products sa mga pantalan ug airport kon kini gikan sa mga lugar og nasud nga apektado sa ASF, ang pagbaligya sa mga karneng baboy nga walay hustong clearance gikan sa provincial veterinarian ug lehitimong ahensya niini, ang pag-ihaw ug baboy gawas sa gitugotan nga slaughterhouse.
Ang mapamatud-an nga indibidwal, buhatan o korporasyon makalapas sa ordinansa, mamultahan sa kantidad nga P1,000 ngadto P2,000 ug pagkabilanggo dili muubos sa 2 ka bulan ug dili molapas sa usa ka tuig.
