*“TASK FORCE CATERING” YA FORMA EL OFICINA DE SALUD*
*BHONG SIMBAJON*
El Oficina de Salud de la Ciudad de Zamboanga ya forma con el se llama *“TASK FORCE CATERING” *que amo el pone atenccion con el mas reciente y mga caso de emvenenada na mga comida aqui na ciudad.
Asegun con el hefe del Oficina de Salud Dr. Rodel Agbulos, ya ordena le con su personajes de sanitaccion para forma en este grupo, que hay imbestiga con el mas reciente alegao emvenenada del serca dos cientos mga estudiante del un famozo privado escuela aqui na ciudad que ya man cater el comida na un conosido “Chinese Cuisine” catering service aqui na fueblo.
Fuera de ese, el TASK FORCE CATERING hay anda Tambien inspecciona con el mga cusina del cada rehistrao catering services aqui na entero ciudad, lo mismo verifica todol diila maga papeles, operaccion y mga manera del preparaccion del mga comida para fuede asegura cay estos ta cumpli el propio sanitaccion y limpio comida que sila ta vende.
Asegun con Dr. Agbulos, prinsipiando este dia, el su mga Sanitary Inspectors hay vulcha yay a mga catering services para hace el diila trabajo y recomendaccion. Llegar el dia de Lunes na venedero semana, estos hay reporta na su ofisina el cosa sila ya fuede hace repazo, trabajo y descuvrimiento.
Ta continua dale aviso si Agbulos con el public para esta asegurao y con quidao na comidam chekya y pruba anay coneste antes de comer todo para esta lejos na problema del venenozo comida. – *Bhong Simbajon/RMN News*
