Aminado ang Task Force on COVID-19 sa Iligan City nga naglisod sila sa pagpangita sa mga tawo nga naka-uban ug mga lugar nga na-bisita ni PH40, ang 54 anyos nga pasyente nga nag-positibo sa COVID-19, nga unang naila nga Corona virus.
Kini tungod kay, matud pa ni Dr. Leonel Quitos, Infectious Disease Specialist sa Adventist Medical Center (AMC), wala mi-kooperar si PH40 ngadto kanila pinaagi sa pagtug-an sa iyang travel history.
Mitug-an lamang kini nga gikan siya’g San Juan, ang epicenter sa virus sa Pilipinas, dihang gipugos kini sa pagpatug-an.
Mahinungdanon alang sa task force nga makuha kini aron madali ang ilang contact tracing ug mapailawom ang mga tawo’ng iyang nakauban sa isolation o kaha sa home quarantine, depende kung under investigation o under monitoring kini.
Si PH40 nahidangat sa Laguindingan niadtong Pebrero 24 nga duna nay gibating ubo, hilanat ug naglisod sa pag-ginhawa, mga simtomas sa COVID-19.
Nadala kini sa AMC niadtong Marso 3 apan na-alarma ang mga nag-atiman niadtong Marso 7 tungod kay wala gidawat sa lawas niini ang antibiotics nga gihatag hinungdan nga gidala na kini sa Northern Mindanao Medical Center ngadto sa Cagayan de Oro niadtong Marso 8 alang sa COVID testing.
Marso 11 nakumpirma nga nataptan kini sa maong sakit.
Miingon si Quitos nga naa na sa maayong kahimtang ang pasyente samtang ang 20 ka mga hospital health workers nga nag-atiman niini gipailawon na sa home quarantine.
Ang pipila ka mga immediate family members usab ang gi-home quarantine na bisan paman wala sila nagpakitag simtomas sa maong sakit. (Divina M. Suson, March 13)
