Davao City – Mas gipahugtan pa karon sa Task Force Davao ang ilang pagbantay sa seguridad sa Dabaw aron dili maka sulod ang mga sakop sa teroristang ISIS nga posibling mudungan sa panon sa mga bakwit gikan sa Lanao.
Sumala ni TF Davao Spokesperson Lt.Col.Randolf Cabangbang nga mas gidoble pa nila ang pagpaniid sa posibleng mga bakwit gikan sa Lanao ugali mudangop sila sa ilang mga kabanay dinhi sa siyudad.
Segun ni Cabangbang, ang katuyoan niini mao ang pagmasanta sa mga teroristang ISIS nga gikasangka sa kasundaluhan didto sa Lanao nga makasulod dinhi sa dakbayan maingon man ang spill over.
Alayon niini, nakigkoordinar na karon ang TF Davao ngadto sa mga deputy mayors sa atong mga Muslims aron mutabang monitor sa mga bakwit nga mahidangat sa mga barangay nga ilang gisakupan.
Gipasabot ni Cabangbang, mahinungdanon masusi ang mga bakwit gikan Lanao aron masiguro nga walay teroristang ISIS nakasabay sa panon sa ingon dili mahitabo ang spill over sa giyera didtong dapita.
Hinoon, kampante ang opisyal nga walay makasulod nga mga terorista tungod sa heightened alert nga gipatuman sukad pa sa deklarasyon sa balaod militar sa Mindanao.
Gidasig ni Cabangbang ang mga Dabawenyos nga magbinantayon sa tanang panahon ug gilayon makig-alayon kanila ugali aduna silay mamatikdang kadudahang tawo sa ilang mga barangay.
RadyoMaN Joel Viray
