Task Force Gitnang Silangan’ gimugna

78

Davao City – Gimugna karon sa Overseas Workers Welfare Administration (OWWA) ang usa ka Crisis Management Committee aron motabang sa mga Overseas Flipino Workers (OFWs) nga anaa sa Middle East nunot sa nahitabong tensyon.

Sumala ni Carmelo Elaya, Chief for Programs and Services Division sa OWWA-XI, gipadala na nila ang mga naglangkub sa ‘Task Force Gitnang Silangan’ kinsa nagbiyahe na karon paingon sa nasangpit nga lugar tumong nga papaulion ang mga trabahanteng Pinoy.

Ang ‘Task Force’ maoy muhatag og asistensiya, maglusad og monitoring, koordinasyon ug maoy mangunay sa tanang panginahanglanon sa mga OFWs sa Iran ug Iraq.

Kahinumdoman nga anaa na sa Alert Level 4 ang miulbong kagubot sa maong lugar gani gikinahanglan na nga mupauli ang mga OFWs.

Hinoon gipasabot ni Elaya nga katungod usab sa mga naasoy ang magpabilin apan kanunay ang ilang hangyo nga mupauli na lamang ilabi na na adunay mga naminyo na usab sa maong lugar.

Sa record sa OWWA-XI, anaa sa kapin 1,600 ka mga OFWs ang nanarbaho sa Iraq diin 24 niini gikan sa Davao Region samtang anaa sa 1,000 ka mga OFWs usab ang anaa sa nasud Iran diin 10 niini gikan usab denhe sa Rehiyon Onse.

Gipaniguro sa Chief for Programs and Services Division sa OWWA-XI nga adunay programa ang ihanyag sa mga ‘distressed OFWs’ sama sa ‘Balik Pinas, Balik Hanapbuhay’ Program diin hatagan sila og tag P20,000 silbing livelihood assistance bisan unsa pa ang ilang estado gawas sa Pilipinas.




Dugang sa maong opisyal sa OWWA-XI nga kanunay ang ilang monitoring sa mga nanimpalad nga mga Pinoy gawas sa Pilipinas.

RadyoMaN Jason Amisola

Facebook Comments