Christmas Tree, sinugdanan
KASAGARAN NGA saysay, accounts, ang modernong Christmas tree nagsugod kini didto pa sa nasud sa Germany atol sa kinatung-ang panahon, middles ages. Niadtong mga panahona gihimo ang usa ka dula kalabot sa una natong mga ginikanan nga sila si Adan ug Eva.
Anaa ang ginama-gama nga kahoy nga gibitay ang ubang mga apple o’ mansanas nga prutas gitawag kini nga “Paradise tree” kahoy kini nga nagrepresentar sa Garden of Eden, halaman sa paraiso diin kining duha didto nanimuyo.
Diha sa maong entablado anaa ang dakong ostiya sa kinatsila pa nga gitawag kini, Barilyos nga nagtimailhan sa mga pan nga ipang-apod-apod sa mga simbahan panahon sa pagsaulog sa pasko, atol sa misa ug kumunyon.
Gumikan kay sa Deciembre 24 musunod man gilayon sunod adlaw ang pasko sa pagkatawo na, Deciembre 25, ang mga kandila dayon dagkotan nga nagsimbolo kana ni Hesukristo isip Siya ang kahayag sa kalibutan, nga maoy ikadugang sa maong kahoy nga gihimo isip Christmas tree.
Sa mao gihapon nga lawak, diha sa kahoy, ang mga Germans maghimo usab ug Christmas pyramid nga ginama sa kahoy, diin adunay pugong niini aron mobarug ang naasoyng Christmas tree.
Sunod dayon nga bahin mao ang mga cokies ug uban pang mga matam-is ibitay kini sa naasoyng Christmas tree inay nga mga ostiya. Ang pyramid usab gidayan-dayanan kini sa mga nagka-berde nga mga prutas, kandila ug mga gagmayng hinimomg mga bituon. Sa 16th century ang pyramid ug ang paradise tree giusa na kini, ug nahimo na gayod nga gitawag nga Christmas tree nga nabantog na karon sa tibuok kalibutan.
Ang Christmas tree gidala kini nga pamaagi didto sa nasud sa Englatera sa 19th century ug gihimo kining gipasikat, popularized ni Prinsipe Albert, ang bana nga German ni Queen Victoria sa England.
Ang mga kahoy gidayan-dayanan kini sa mga kandila, candles, papel nga kadena, mga cakes nga gibitay sa mga sanga-sanga sa maong kahoy ug mga laso. Ang mga lalin, settlers nga mga German, nagdala niining batasan sa paghimo ug Christmas trees didto sa koloniya sa Amerika sa 17th century.
Sa 19th century ang paggamit sa Christmas tree naglukop ug mikanap na kini.
Ang Christmas trees bantog kaayo didto sa mga nasud sa Austria, Switzerland, Poland ug Holland. Didto sa China ug Japan, ang mga misyonerong mga Christians midala sa Christmas trees sa 19th century.
Ang uban niini nakatuon na sa pagdayan-dayan usab sa mga papel nga mga bulak. Ang paggamit sa berde nga bulok miabot didto sa Northern Europe, Italy, Spain ug uban pang mga nasud nga naggamit sa mga bulak nga buhi, live flowers.
(c) Edgardo Beltran
