Patay ang 3 ka mag ulutod matapos gin pang gulot ang ila mga li-og gamit ang plamingko sang ila mismo magulang nga may deperensya sa panghuna-huna. Natabo ang insidente takna alas 12:30 kahapon sang udto sa Upper Palala, Brgy. Marcelo, Banwa sang Calatrava , Negros Occidental.
Gin kilala ang mga biktima nga sanday Gregor Melibo, 1 ka tuig, Alejandro Melibo, 5 ka tuig kag Jhorenz Melibo 14 anyos samtang naka luwas naman ang ila utod nga si Jenny Rose Melibo, 9 anyos.
Ginkilala man ang suspek kay Junmark Melibo 21 anyos kag magulang sang mga nagkalamatay.
Suno sa inisyal nga impormasyon, nabilin sa ila puluy-an ang mag ulutod tungod nag tambong sang PTA meeting sa Marcelo Elem. School ang ila amay nga si Morito Melibo, 50 anyos samtang naga obra naman sa Manila ang iloy sang mga biktima.
Sa dugang pa nga impormasyon, gin lagas pa sang ila mga ka ingud si Junmark apang naka palagyo ini kag nag-padulong sa direksyon sang Puting Bato, boundary sang Marcelo kag Minapasok nga dala sa gihapon ang plamingko nga gingamit sa pagpamatay sa iya mga utod.
Naga pabilin sa ila puluy-an ang bangkay sang mga biktima samtang padayon sa gihapon nga ginapangita sang Calatrava PNP ang suspetsado. Nahibaluan nga magapauli man bwas nga adlaw halin sa Manila ang iloy sang mga biktima.
Sa pinakaulihi nga impormasyon sang PNP, nangakig kuno ang suspek nga magulang bangud wala ma preparahan sang panyaga sang iya mga manghud.
Photo credit : Calatrava PNP (C) Jennifer Debaja Palomo
