Tatlo ka mga ginasuspetsuhan katapo sang New People’s Army (NPA) ang natigayon nga madakpan kagab-i sa Brgy. Tampalon, Kabankalan City kun diin ini ang ginsundan sang isa ka enkwentro sa tunga sang mga katapo sang Philipine Army kag mga rebelde sa amo man nga lugar sini gid lamang nga kaagahon.
Nakilala ang mga nadakpan nga amo sanday Jomar Reyes, Alyas Ka Tiny, 28 anyos, pumuluyo sang Brgy. Locotan, Kabankalan City, Rona Degoso, Alyas Ka Che-che, 18 anyos sang Brgy. Asia, Hinobaan kag si Abraham Villanueva, ginatudlo nga kumander sang grupo.
Ginpahayag nga may mga alas 9:20 kagab-i sa Sitio Amian, Brgy. Tampalon nadakpan ang mga suspek kasunod sang intelligence report nga ini sila ang mga katapo sang rebelding NPA.
Samtang, pasado las 5 naman sini gid lamang nga aga may nagluntad nga enkwentro sa boundary sang Sitio Amian kag Sito Barunggis sa amo man nga barangay.
Nahibalaun nga naka-enkwentro sang mga katapo sang Bravo Company sang 15th IB sang Philipine army upod ang 604th Regional Mobile Force ang wala matumod nga numero sang mga NPA.
Sa karon padayon ang pursuit operation nga ginapatigayon sang militar lakip na ang pag-validate kon bala may nasamaran ukon casualty sa amo nga enkwentro. /rcsg
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
