Padayon nga ginamonitor ang tatlo ka mga locally stranded individual’s kag returning OFW nga nagpauli dire sa South Cotabato nga nagpositibo sa COVID-19 nga nalatnan sang virus sa iban nga lugar.
Pinakaulihi dire ang isa ka OFW sa Tantangan nga nagnegatibo sa una nga test sa Metro Manila, apang sa sulod sang 11 ka adlaw sa isolation facility nabudlayan ini nga magginhawa amo nga ginkuhaan sang swab sample para masikyar nga una nga kaso sang COVID-19 nga nakumpirma sa bag-o lang bukas nga COVID-19 testing laboratory dire sa syudad sang Koronadal.
Suno kay Provincial Health Education and Promotion Officer Hannah Ebeo ang nagpositibo sa Tampakan ang nagbata na kag yara man suno pa sa maayo nga kondisyon ang lapsag nga gilayon nga ginbulag sa iloy.
Samtang ang pasyenti naman sa Tantangan ang nagaubo pa kag padayon nga ginapaidalom sa medikasyon kag ang nagpositibo sa Koronadal ang yara naman suno pa sa maayo nga kondisyon sa diin ginahulat na lang nga matapos ang 14 days quarantine.
Dugang pa ni Provincial Surveillance Unit Officer Celia Lorenzo nga padayon ang ginapatigayon nga contact tracing sa nakaupod sang pasyenti nga taga-Tantangan sang nagpauli dire sa probinsya.
Ginkumpirmar man ni John Codilla, infectious disease coordinator sang IPHO nga yara na sa 42 ang napaidalom nila sa test sa COVID-19 laboratory testing center halin sang Hunyo 8 tubtob kahapon nga adlaw.
