Patay ang tatlo ka suldado samtang pilason ang apat ka iban pa sa isa ka engkwentro sang militar sa mga ginapatihan katapo sang New People’s Army (NPA) sa Barangay Carabalan, Himamaylan City, las 10 kaina sang aga, Abril 19, 2020.
Ini ang gin-confirm ni 303rd Brigade Commander Col. Inocencio Pasaporte.
Suno sa inisyal nga report, nagapatigayon sang combat patrol kag information dissemination ang mga katapo sang 94th Infantry Batallion angut sa COVID-19 sang naka-engkwentro ang mas o menos 20 ka miyembro sang NPA.
Nakabaton sang report ang otoridad nga may presensya sang armed group sa lugar nga nagapang-extort sa komunidad kag ginapwersa ang mga ini nga maghatag sang kwarta kag bugas.
Dugang pa ni Pasaporte nga sang malapit na lang sila sa mga grupo sang NPA, ginhabuyan kag ginpalukpan ang mga ini sang improvised explosive device (IED) kag hand grenades nga nangin rason sa gilayon nga kamatayon sang mga suldado.
Naglawig sang 30 minutos ang engkwentro.
Napatay sa insidente ang isa ka Lieutenant kag isa ka suldado. Napatay naman ang isa samtang gina-evacuate sa lugar.
Ginpangdala naman sa syudad sang Bacolod ang mga napilasan nga pulis para sa pagbulong.
Ginpasigurado naman ni Pasaporte nga “in full control” ang militar sa sitwasyon.
