Cadiz City, Negros Occidental – Tatlo ka mga pasahero ang patay kag apat ang pilason matapos ang nagluntad nga aksidente sa Stop Oso, National Road, Barangay Burgos, Cadiz City, Dominggo, Enero 28 sang gab-i.
Ginkilala ang mga nagkalamatay nga sanday Angelica Laguna, 27-anyos, Zian Niel Gonzales, apat ka tuig ang edad, kag Joana Valero, 25-anyos.
Nagkapilasan naman sanday Mario Gonzales, 30-anyos, Mary Grace Castro, 24-anyos, Crystalyn Joy Palma, 22-anyos, kag Gregyn Palma, 49-anyos.
Suno kay PO1 Jerry Belascuain Jr., ang Traffic Investigator sang Cadiz City PNP, papauli na ang pamilya gikan sa ciudad sang Cadiz sang hinali lang nga nabunggo-an sila sang isa ka Mitsubishi Fuso Canter nga may karga nga sapat gikan sa ciudad sang Bacolod.
Dugang pa sang pulis, posible nga nag-overtake ang Canter bangud nga gin-agaw na sini ang dalan sang tricycle.
Wala gilayon makaguwa ang mga sakay sang tricycle nga nangin rasun sang ila kamatayon kag nagtabog naman ang mga pilason. Dalahig man sa aksidente ang nagasunod nga motorsiklo.
Bangud sa kabaskugon sang pagbunggo, nagtabog man ang goma kag manebela sang tricycle.
Sa karon, wala pa nagsungka ang nagpalagyo nga driver sang Canter nga may plate number GHP 518 nga ginapanag-iyahan ni Ramiro Diosana sang Barangay 29, ciudad sang Bacolod.
Kun madakpan, magapangatubang ang driver sang kaso nga reckless imprudence resulting to multiple homicide kag multiple serious physical injury ang driver.
———————–
For more news updates and information like our official Facebook page: www.facebook.com/ifmbacolod943
