KALIBO, AKLAN — Arestado rong sangka tattoo artist sa ginpatigayon nga buy-bust operation kabii sa Brgy. Yapak, Malay, Aklan.
Ro nasambit nga suspek nakilaea kay Rafael Badilla y Alfabete, 34-anyos ag naga istar sa Sitio Bolabog, Brgy. Balabag, Boracay.
Naaresto si Badilla matapos nga mabakean ko poseur buyer it sangka sachet ko ginadudahan shabu kabaylo it 1,500 pesos nga buy-bust money.
Sa ginpatigayon nga body search nabuoe pa gid kana rong daywa pa ka mga plastic sachet it ginadudahan shabu ag ro buy-bust money.
Ginpatigayon ro nasambit nga operation ko mga taga Malay MPS, Boracay Tourist Assistance Center, 605th Maritime ag 12IB TIU.
Si Badilla hay detained sa lock up cell it BTAC ag magapangatubang it kasong pagbayolar sa RA 9165.
