Davao City – Gipaniguro sa 10th Infantry Division Philippine Army nga walay makasulod sa pagkasundalo nga adunay tattoo sa lawas kay mao kini ang usa sa istrikto nga palisiya alang sa tanang aplikante sa pagkasundalo.
Sumala ni 10th ID Spokesperson Captain Jerry Lamosao nga dugay na kining palisiya sa Armed Forces sa nasud ang pagbawal sa tattoo sa tanang aplikante sa pagkasundalo.
Segun ni Lamosao, bisan pa og pasado sa ubang proseso ang aplikante apan kun masuta nga dunay tattoo ang lawas lagpak dayon o dili ba kaha i-required nga ipa-erase ang mao nga tattoo.
Sa pagtuon sa mga batid sa medical, ang dagom nga gamit sa pagtattoo mahimong tinubdan sa lahi-lahi nga balatian tungod sa virus ug bacteria nga musulod sa bangag niini.
Magpabilin sa bangag sa dagom ang virus o bacteria nga makuha gikan sa masakiton nga magpa-tattoo ug delikado kini mabalhin ngadto sa tattoo fanatic.
Gibatbat ni Lamosao nga buot sa pamunuan sa AFP nga makabaton og sundalong kansang limpyo ang lawas ug magdan-ag sa maayong imahe aron dili masawayan sa publiko.
Busa kun sa eksaminasyon madiskubre ang tattoo sa lawas diritso na sa basura ang aplikasyon ug wala na’y kahigayonan nga makasulod sa pagkasundalo ang aplikante.
Apan wala gihikling sa opisyal ang posibilidad nga basin dunay mga sundalo nadani ug nagpa-tattoo dala na sa kaibog sa kaanindot sa mga hulagway niini.
Gibatbat pa ni Lamosao, ang pamunuan sa AFP wala magpasagad niini ug gilayon pasidan-an ang mga ginsakpan sa pag-erase sa tattoo ug dunay tugbang nga silot sa kadtong dili mutuman sa kamanduan.
RadyoMaN Joel Viray
